يْغرق الشـاعر إذا خانه محيطه=يبتسم في عينـه الشْط ويصادف


ان اول منكـره فكـره بسيطـه=قالت ان الغيـم بالقيعـان ناشف


حدّقوا ثم قالوا الفكـره عبيطـه=ما تنم الا عن اعجـاز المعـارف


واسْتعارت شمسْهم رمل البسيطه=وصفّرت في بابي اشباه العواصف


أنا دوزنت اللحن واشتّـد خيطه =دورّي فـ:/حبلي مكانك للمناشف


يغرق الشاعر إذا وضّف جهوده =بين قال فـلان! لفلان الكـلام؟ 


والكلام اللي انكُتب له مع ردوده =قال عنهـا تجربة عشرين عام


ذم عرق التفرقه وجمع حشوده=نصبـّوني في منابركـم امام 


نصّبوه وقام من خلسْة وجوده=حاكمِ يعـرف مفاهيم الخصام 


حكّموني وحاكموني يا جنوده=عن غنائمكم رضيت الانهزام 


والله ان القاف له ناسٍ تقوده=شفْ مكانه بينهم قبل الزحام!


شْف نتاجه قبل تاجه في ركوده =ثم قلّـد شاعره هذا الوسام!


يْغرق الشاعر بعد عْسرَة مخاضه =فـ ميـاهٍ تحتـوي رغبة تَمنّي


يمكن الغرقان (يابس) يمْ خَاضَه=ويمكن (اليابس) تعّدى فيه ظنّي


المّهم يولْـد رغم وسْع اكتظْاظه=ثم يبـدأ يرْضع الجـرح ويغنّي


يزعج الحاره بفكْـره وامتعاضه=يعني موْلـُودٍ على فطْرَتْه ِجنّي


بعدها يكبر وتشْغلـه إنتفـاضه=في محيطـه حتى يجنْيه التجّني


يا محيطـه كلمـا يعطيك قاْضه=ناسكٍ سارق انا ابرأ فيـه منّي


يشكّر اللي مد له عفو اقتراضه=داينه للحين في وْضـع متّدني 


ودّي المأسور في حكم اعتراضه=ياخـذ النكـران ويدرّسْه عنّي


يغرق الشـاعر ويطلب عونه =ثم يركض غـيره لتوصيله


يقطع الشـاطي الى مليـونه! =ويفقـد المليون مع تحصيله


صّوتوا له ارجع ارجـع دونه=هنـاك غيرك يمكنـه تحويله


ينقطع شارعه في مضمـونه=ويعتكف شاعره في توصيله


يخرج من ايديه اصابع كونه=ويحترق في داخـله تعليله


يحترق ثم ينطفي بدخـونه!=بلا عبق حرْفَه طفى منديله


يبْتـدي مدمن على غليـونه=يعصر التـوراة في إنجيله


وينتهي غرقان وسط ديونه=يقـال له والله ما بْك حِيله!


يغرق الشاعر ويطلب عونه=وتحْرمه فزْعتْه (ناس بْخِيله)


يغرق الشاعر ويبقى عـائم =في زراقٍ يمتحنّي شْرطـه 


هي سماء أو جو فيها غائم =جنبّـو حتى تجيه الشرطه


قالو اسـأل ظالم أوْ لَه ظالم =قلت ظالم شال حزنهْ وّحطه


في جبين الغيـم عمرٍ حالم =وابتسم له حظ غيمه غْلَطه 


فّكوا شفرة هالقتيـل القادم =علّ في صوته يواري غبطه


فكوا حنطة هالسمار القاتم=يمكن يخبّي بياضـه حْنطه


يا غلالي حزني المتفاقـم=صاحبي ولّه عليّه سلطـه


شبري اللي ما عتقني خادم=شاف شبّاك وعطاني شنطه


ما سألني عن شعور واجم=مات ما بيّن بعرقه جْلطـه 


يغرق الشاعـر وحبره قائم=في عزاه المهد ينسج قَمْطه 


يغـرق الشاعر ويمّه دولهْ =يمسك بأطرافهـا ويفـارق


مـدْ كفّـه لخصلةٍ مجدوله=وقالت الليله أبيـك تفـارق


لـمْ شْمل اشعارك المبلوله=لأندلسّـك الغارقه يا طارق


أثْرها في قرْشها مقتـوله=عنبر الحوت بجْسَدْها عابق!


عن حقوقك ماهي بمسْؤوله=عن عقوقك اسأل اللي بايق


عمرك وإدعي لعمره طْوله =ثوب أسمالك بفكّـه طابق!


شق سترة فقْرك المجهوله =فـك بابٍ لو فتحتـه غالق 


الطفوله مخْتصرها أطفْو/له =نار شعره من لهيبه حارق


معصمه لا عصمته ماكو/له =اطلقي بوجهه ثلاثٍ طالقْ


واطلقي آخر عنـان خيوله=وانفضي للريح ساقٍ عالق


يغرق الشاعر بدونه حوله =عـانسٍ تطلب ترّده عاشق 


يغرق الشاعر فـ:/ حزنه لإستياءه =ويغلق أبواب القصيـده في حروفه


سبْعـه وعشرين حرفٍ قبـل ياءه=خـايفٍ ياءه تعـدّيه وتطـوفـه 


يرْتطم في فكـرته ويكسـر إباءه! =وتوقف بنص الشهر رحلة خسوفه


اي نصٍ يكْمــل البـاقي طلائه؟=اي نصٍ يخجـل النقّـاد شـوفـه


صاحبي الحرف لو يهْـدم بنـاءه =وش على البنّـاي لو ميّـل وقوفه


أكتب أكتب قارئك ما شـاف راءه =يعتـذر ما وسّـد الضاد لظروفـه 


ويكتب أصل الطيب راجع لإنتماءه =وان عرقه تعرف الغـابه سيـوفه 


لو يكون ابن الردي ولـد الاساءه =يعني تطلع وشمة العـار بكتوفه؟ 


صاحبي شمسك بعيده عن سماءه=حر يرسـم في معاليقـي طيوفه


اتركـه للظـل الاسود في رثائـه=اتركـه يعزف معك نغمة عزوفه 


جنّب الُمنكَـر بلاءك عن بـلاءه!=واعتذر للحفل عن رغبة ضيوفه 


يغرق الشاعر بتجميـل انتمـاءه=يغرق الشاعر اذا زادت وصوفه